THUPATNA
Grik pau a “Farisaioi” (Farisai) cih kammal pen Aramic pau “Perisayya” pan a kilasawn hi-in, “sehtuam/teeltuam” (separated ones) cihna ahi hi (Rom. 1:1). Amaute pen Judah biakna a zui mite laka a vanglian leh mi a thuzawhthei mi ahih manun, BC kum zalom 1-na hun lai pek a kipanin min a nei khinsa leh mite zahtak ahi uh hi. Tua ahih manin, amaute makaihna tawh Judah biakna pen kalsuanin, tuni a Judahte biakna kipatna bulpi khat suak hi. Farisai-te pen Saddusi-te bang loin, AD 70 kum a kipanin a hun thak uh kipan phing hileh kilawm hi.
1. FARISAI KUATE HIAM?
A tamzawte pen inkuan ngeina (middle class) – sumbawl leh khutsiamna a nei (artisan) inkuan – pan a kipan ahi uh hi. Pawl neucik leh member tawmcik ahih uh hangin, mite thuzawh siam mahmah uh hi. Tua ahih manin Floyd V. Filson-in, Judahte vaihawmna sangpen Sanhedrin-ah zong mun (seat) tampen luahin, tua bangin Judah minamte tungah vaihawm uh hi, ci-in gen hi. Tangthusiam Josephus-in, Judah minam tawh kisai vailian khat peuh thukimna a kibawl ding ciangin, ukpite leh Siampi lianpenpa ngaihsutna sangin Farisai-te thukimna kingak zaw hi, ci liang hi. Vaihawmna mun-ah tua zahta in a thu uh kingak hi tamah leh, mite a thuzawhna taktak uh pen biakpiakna (synagogue) sung panin hizaw leh kilawm hi.
A tung a kigensa mah bangin, amaute in Saddusi-te tawh kibatlohna pawlkhat nei uh hi. Gentehna-in, Saddusi-te in a kigelh Moses Thukhamte (written) bek a san’theih lai-in, Farisai-te in a kigelhlo Thukham (oral Law) tengteng zong sang khin uh hi (cf. Mk. 7:3). Tua banah, Thukham hilhsiate (rabbi) in a kaihkhop uh Thukham hilhcianna bu tuamtuamte zong sang khin thei uh hi.[1] Misite thawhkikna omin, nuntak tawntungna zong om a; mi khatpeuh ama gamtatna tawh kituakin thukhenna (punishment) om ding hi, cih zong sang uh hi. Hih teng banah, vangtungmi (angels) leh kha (spirits) zong a om lamtak sang uh hi (Sawl. 23:8).
2. THUKHAM TAWH KISAI UPNA
Amaute zong Thukham hilh siate mah bangin, Thukham tawh kizopna hoih tak nei uh hi. Ahi zongin Farisai-te pen, Thukham hilhcian dan a siamtuam diakte ahi uh hi. Tua banah, amaute in Messiah hong paina ding lampi a sialkhol pawlin kituat uh ahih manin, paubanna om loin Thukham zui-in, tua tungtawnin Pasian mi hihna diktak lahkhiat sawm uh hi. A tomin gen lehang, Thukham zuihna tawh dik ngah a sawmte ahi uh hi. Tua bang a Thukham a zuih ciatciatna uh hangin mite in zong thupi ngaihsutin, etteh khatin nei uh hi.
Tua ahih manin, Thukham a zuilo mi peuhmah – Jesu hi-in, a nungzuite hita leh – a galte uh suak hi. Pasian in puatham dikna leh hoihna sangin, mihingte lungsim enzaw hi, cih pen thei khalo uh hi. A man takin ci lehang, puatham dikna leh hoihna a limbawl luat uh man in, Jesu in kolawh zawsop hi (Mt. 23:5-7; Lk. 11:43). Tua ahih manin, amaute kikalah kitelkhialhna omin, a tawpna-ah Saddusi-te tawh Jesu thahna ding vaihawm khawm uh hi. Pasian adinga a sepna uhah buailua uh ahih manin, Jesu adingin a lungsim uhah mun-awng om manlo hi. Gendan dang khatin gen lehang, amaute pen biakna mi lua uh ahih manin, a mit uh taw hi (their religiosity, a barrier to Christ), kici thei ding hi.
[1] Hih oral law leh kaihkhop hilhcianna pen AD 200 pawlin a bu in kibawlin, Mishnah kici hi. AD 1-na hun lai-in, Farisai-te laka makai nihte – Hillel leh Shammai – pen minthang tuam diak mahmah uh hi.
LAI-LEENG 