Kumpi Herod pen Edom mi (Idumean), Antipater tapa nihna hi-in, amah in Judah gam pen 37 BC panin AD 4 dong uk hi. Amah pen gamdang mi ahih hangin, biakna tawh kisai-in Judah biakna a zui mi khat ahi hi. A pa Antipater in Rom kumpi adinga a nasep hoihna hangin, Rom kumpi ukna sung a om Judah gam pen Herod innkuan khut tungah ap hi. Lai Siangtho sung panin Herod tate’ kumpi a suak tampi kimu thei hi.[1] Rom kumpi tanga Judah gamsung uk ahih mah bangin, Herod in Rom kumpi a lungkim sak theihna ding bekbek ngaihsun hi. A nasep hoihna hangin Rom kumpi-in amah a huh dingin galkap nangawn pia in, amah in a ukna gam lianpi keeklawh zo hi.[2] Ahi zongin amah pen hehpihna a neilo, a huham (brutal) mahmah mi ahi hi.
A nasep hoihna hangin “Judahte kumpipa” ci-in amah leh amah min kivawhin, a sih ni dongin tua min tawh kiciamteh hi. Amah a muang Judah mi pawlkhatte in Herod pen Messiah hi dingin tuat uh ahih manin, bia liang uh hi. Mipilte tungtawnin Judahte kumpi ding a suahna thu a zak tak ciangin, a lungmang lua hi (Mt. 2:3). Bang hang hiam cih leh, amah cih simloh pen Judahte kumpi ding midang a om thei dingin tuat ngeilo hi. Tua ahih manin, amah in naupang tampi tak that hi (cf. Mt. 2:13-15). A thahte lakah Judahte kumpi dingpa zong kihel ngel dingin ngaihsun hi.
Kumpi Herod nungzuite pen “Herod Pawlte” (Herodians) kici-in, amaute in Herod pen kumpi ding leh Messiah dingin sang uh hi. Siampi laigelhte (Rabbinical Literature) sungah amaute pen “Herodians” kici loin, Boethusians[3] (Boethus Pawlte) ci-in kigelh hi. Herod Pawlte in Herod nuntakna-ah, Messiah pianzia ding a kigen khempeuh pen bukim in tuat uh hi. Tua ahih manin, amaute in Jesu pen Messiah in sang zolo uh hi. Herod Pawlte pen Farisaite tawh kigal (enemy) hi napi-in, Kaisar tung a siah piak ding vai-ah ngaihsutna kibang nei uh ahih manin, Rom kumpi tungah muanhuai tuaktuak uh hi dingin lamethuai hi. Tua mah bangin, Jesu thah ding vai ah Farisaite tawh thukimna nei uh hi. Jesu hangin amaute pen Farisaite tawh pawlkhat suakin, a siahuai nasem dingin kithutuak, cihna tawh kibang hi. Amaute pen Galilee leh Jerusalem a om Jesu langpangte ahi uh hi.
[1] Herod tapa Judah gam a ukte min pen hih bang ahi hi: Herod Philip (Mt. 14:13; Mk. 6:17; Lk. 3: 1, 19); Herod Arkhelaus (Mt. 2:22); Herod Antipas (Mt. 14: 1-10; Lk. 3:1-9). Tua banah, kump Herod tute min zong Sawltakte Tangthu sung panin kimu-in, amaute pen Herod Agrippa I (Sawl. 12) leh Herod Agrippa II (Sawl. 25:13-17, 28)-te ahi uh hi.
[2] Amah in Judah panin Syria, Syria panin Lebanon ciang dong gam keek hi.
[3] Boethus tanu Miriam pen Herod zineu khat suakin, Miriam tawh a tate pen Siampi lian dingin kiseh hi.
LAI-LEENG 