THUPATNA
“Messiah” cih kammal pen Hebru pau “Mashiah” pan a kilasawn hi-in, “thau nilh” (anointed) cihna ahi hi. Thuciam Lui hun lai-in siampipa in Pasian sehtuam mikhat peuh nasem dingin a kipsak ding ciangin, a lu tungah sathau nilhna nei zel hi. Tua mah bangin “Messiah” deihna bulpi tak pen, sathau nilh genna ahi hi. Gentehna-in, Pasian kamsangte leh Pasian teelmi khatpeuh tavuan a kipiak ding ciangin, a lutung uh a “sathau nilhna” tawh kikipsak zel hi.
Tua banah, “Messiah” pen Israelte kumpi tuamtuamte genna-in zong kizang hi. David khanggui zui a piang kumpite genna-in kizang diak hi (Lat. 18:50; 89:20, 38, 51; 132:10, 17). “Messiah” cih kammal pen Grik pau in a kitei ciangin Kristos (Eng. “Christ”) kici-in, “thau nilh” cihna mah ahi hi. “Messiah/Christ” pen Jesu min (name) hi loin, Amah a kisapna min (title) khat mah ahi hi.
1. MESSIAH BANGCI BANG MI HI DING?
Judahte lakah Messiah hong pai ding hi, cih upna tawh kisai-in gen ding tampi tak om kha ding hi. Ahi zongin, tomno bekin gen sawm ding hi hang.
Judahte in, Messiah in kumpi gam thak (political kingdom) phuan ding hi, cih upna pen kip takin len uh hi. David kumpi gam hong kisiat tak ciangin, Israelte pen Pasian ukna nuai-ah (theocracy) omin, kumpi zong nei loin; siampite pen gam leh minam makai suak uh hi. Gam dangte (e.g. Babylon, Persia, Grik, Syria leh Rom) ukna nuai-ah hun sawtpi omin, haksatna zong nakpi takin thuak uh hi. Ahi zongin Pasian in kumpi David tunga a kamciam: “Na suanlekhate leh na kumpi gam keima mai-ah kip tawntungin ka bawl ding a, na kumpi tokhom kip tawntung ding hi” (2Sam. 7:16), a cih pen nikhat ni ciangin tangtung teitei dingin amaute (Israelte) in lamen uh hi. Tua mah bangin, Amah (Messiah) in kumpi David khanggui hong zui ding hi (cf. 2Sam. 7; 23:1-5; Lat. 89:19-31; Isa. 9:6-7; 11:1-9), ci uh hi. Tua ahih manin, Messiah pen kumpi David bangin thahat in zong hangsan (political) ding a, a ukna gam kiling ngeilo ding hi. Amah hong kilat hun ciangin Israelte galte khempeuh susia ding a, na lamdang tampi tak zong bawl ding hi, ci-in ngaihsun uh hi.
Messiah hong pai ding thu pen Israel mite lakah tua zahta in a thawm lian hita mah leh, AD kum zalom 1-na hun lai a Judahte lakah Messiah hong pai ding tawh kisai-in ngaihsut dan leh muh dan tuamtuam om hi. Gentehna-in, Saddusite in Messiah hong pai ding pen lamen lo mikmek uh hi. Ahi zongin Essense[1] te leuleu-in, Messiah in kumpi leh siampi hihna thuahkhawm ding hi, ci uh hi. Bangbang hita leh, i ngaihsut ding pen Khristiante Messiah ahi Jesu Khris tawh kisai thu ahi hi.
2. KHRISTIANTE MESSIAH MUHDAN
Synoptic Gospels sung i et ciangin, Messiah lim le meel leh a nasepte pen kician mahmah hi. Israelte in Messiah ana lamet dan leh muhkholhna tawh a kituak pawl a om laitakin, a kituak lo zong om veve hi.
(a) Messiah in Ama Kumpi Gam Phuan Ding (Spiritual Messiah): Judahte in Messiah in leitungah a kumpi gam phuan dingin tuat uh hi. Ahi zongin Khristiante-in, ‘Messiah kumpi gam pen leitung kumpi gam (political kingdom) bangte hi loin, Kha lam kumpi gam (spiritual kingdom) hizaw hi,’ ci-in ngaihsun uh hi. Tua ahih manin, Messiah taktak (Jesu) a hong kilat ciangin, Judahte in telkhialin, Amah pen lehdo in nakpi takin bawlsia zawsop uh hi. Bang hang hiam cih leh, Ama kumpi gam in leitung tawh kizopna neilo hi (Jn. 18:36). Tua banah, amaute ngaihsutkholhna bangin Messiah hong kilang loin, Amah in leitungah kumpi gam zong phuan lo hi. A tomin gen lehang, Jesu hong pai dan pen Judahte ngaihsutna tawh kilehbulh lua ahih manin, amaute in Messiah in sang zolo uh hi.
(b) Messiah in Thuak Ding (Isa. 52:13-53:12): Judahte in ‘Messiah in thuak ding hi,’ cih pen tel lian lo uh hileh kilawm hi (cf. Isa. 52:13-53:12). Misiam pawlkhatin (e.g. Joachim Jeremias) Judahte lakah zong Messiah thuak ding thu pen kigen mah hi dingin a tuat laitak, Thuciam Thak hunma deuh a ngaihsutna om tawm pan hizaw dingin mi tamzawte in tuat uh hi. Tua banah, Khristiante laka a kigen gen, ‘Messiah pen Ama mipihte in nial ding hi,’ cih upna pen Judahte lakah kiphawk kha lianlo tawh kibang hi.
Tua ahih manin, Messiah thuak ding thu pen Khristiante upna tawh kizui-a kigen hizaw leh kilawm hi. Messiah in a thuakna tungtawnin a mite honkhia ding hi, cih pen Khristiante lametna ahi hi. Tua mah bangin, Isaiah (52:13-53:12) in Messiah thu a genna pen Jesu nuntakna – a sihna leh thuakna – panin kimu thei hi (cf. Lat. 22; Mk. 10:45).
(c) Messiah pen Kamsang Hi Ding (Prophetic Messiah): Khristiante in “Messiah pen kamsang Moses bang hi ding hi” (Thuhilhkikna 18:15-20) cih upna a neih pen Judahte lakah kithei kha lo hileh kilawm hi. Bang hang hiam cih leh, gamdang kumpite ukna nuai-ah lim thuak lua uh ahih manin, Messiah pen kumpi David bangin galhat ding hi, cih lametna neizaw uh hi. Kamsang ahihna ding thu a kigenna pen muh ding tam khollo hi.
Kamsang ahihna bangin, Jesu in Moses mah bangin a mite adingin Thukham thak (re-interpretation) a piakna pen Lungdamna Thu Matthai gelhna sung panin kitel mahmah hi (e.g. Mt. 5:17-48). Amah (Messiah) pen Moses mah bangin paubanna om loin nem hithiat a, a mite thuak tangin a thuakpa ahi hi.
(d) Kumpi David Mah Bang Hi Ding: Messiah pen David Suan hi ding hi, cih upna pen Judahte lakah lian mahmah hi (David Suan tawh kisai thu pen a nuai-a khenpi sungah a kicingzaw in kigen hi). Ahi zongin, Khristiante in Messiah pen kumpi David sangin lianzaw dingin ngaihsun uh hi. Bang hang hiam cih leh, Messiah in Israel minamte ading bek hi loin, mi khempeuh adingin thuakin, si a; tua a sihna tungtawnin Amah a um mi khempeuh adingin nuntak tawntungna pia hi. Tua ahih manin, Messiah pen kumpi David bang a Israel minamte ading bek a gumpa hi loin, leitung khempeuh gumpa suak hi. Tua banah, Ama ukna pen kumpi David ukna banga a bei thei hi loin, a tawntungin kip paisuakin, zong zai semsem ding hi.
(e) Na Lamdang Bawlna Panin: Judahte lak-ah, Messiah in na lamdang bawl ding hi, cih ngaihsutna zong om hileh kilawm hi. Tua mah bangin, Jesu in Pasian vang tawh na lamdang tampi bawlin, dawite hawlkhia a; mittawte khua musakin, khelbaite lam paisak hi (cf. Mk. 5:30 = Lk. 5:17; Mk. 6: 2, 5, 14; Mt. 12: 22-30; 15:29-31). Luka 7:11-17 sungah Amah in Messiah ahihna tawh meigongnu tapa hingkik sak hi. Tua mah bangin R. H. Fuller-in, Jesu na lamdang bawlte in Pasian kiang pan a hong pai Messiah ahihna kilang sak hi (cf. Sawl. 2:22; 10:38), ci-in gen hi.
Tua ahih manin Khristiante Messiah muh dan leh Judahte muh dan pen kidang mahmah hi. Bang hang hiam cih leh, Khristiante Messiah pen Pasian in a thuak ding leh a si dinga a thau nilh kumpi ahi hi. Amah a kipiak tawmna hangin, Amah in sihna leh gitlohnate tungah gualzo-in, Ama mite adingin lametna thak guan hi.
THUKHUPNA
A tunga kigenna panin, Messiah (Hebru) leh Christ (Kristo, Grik) pen a deihna kibang ahihna thu kimu hi. Tua ciangin, Jesu pen Messiah taktak ahihna zong kimu hi. A thuakna, Moses bang a kamsang ahihna, kumpi David bang a kumpi ahihna leh na lamdang a bawlnate panin Messiah ahihna pen kithei thei hi. Tua banah, Marka 8:29 sungah Piter in Jesu pen Messiah ahihna thu na pulak hi (cf. Jn. 20:31). Ahi zongin Jesu pen kumpi David leh kamsang Moses-te sangin thupizaw tham pek ahihna i phawk ding ahi hi.
Pawlkhatte in (e.g. Wilhelm Wrede) Jesu in Messiah ahihna pen gen ngei lo ahih manin, Khristian masate in a nung ciangin a bulhtawm uh ahi hi, ci-in gen uh hi. Ahi zongin a mantakin cilehang, Jesu in Messiah ahihna a tangkona hangin Amah pen a kithat hizaw hi (cf. Mk. 8:29; 14:61-2; Mt. 26:64). Judahte in Jesu pen Messiah dingin sang thei loin, thah dingin gel uh hi. Amaute in Messiah pen kumpi David bang a galhat dingin tuat kha uh hi. Tua banah, Pasian Tapa in Singlamteh tungah a mulkimhuai sihna thuak ding cih peuhmah pen sang thei ngeilo uh hi.
[1] Essene-te pen Si Tuipi (Dead Sea) gei-a suanghawm (cave) sunga tengte hi-in, amau zat ding Lai Siangtho tuam tei uh hi. Tua banga a tei leh hilhciante uh kigelhna pen “Dead Sea Scroll” kici hi. Amaute laibu gelhte pen 1947 kumin tuucing naupang khatin a tuucinna panin mu in, tua hun a kipanin amaute tangthu pen kisut thei pan hi. A laigelhte uh pen Rom kumpi-in Essene minamte a sukmaimang hunma AD 68 pawl a Tuipi Si kim a om suangbukte sungah kiselsim hi dingin misiamte in tuat uh hi.
LAI-LEENG 