PASIAN TAPA (SON OF GOD)

THUPATNA

Jesu a kisapna minte (title) lakah Pasian Tapa cih pen a thupi pen a kigen khat ahi hi. Mihing Tapa bangin Pasian Tapa cih zong Lungdamna Thu bute sung-ah kilim gelh mahmah hi (e.g. Mk. 14:33; 27:54; Mk. 15:39; Lk. 1:35). Hih kammal pen, Jesu hunma pek pan a kizang kammal hi-in, Grik mite in “midik/mihoih,” “kumpi,” “mipil/misiam,” “siampite” leh “pasiante” genna dingin zang uh hi. Tua mah bangin, Judahte in zong Israel mite pen Pasian teltuamte ahih manun, “Pasian tate” ahi uh hi, ci-in gen uh hi (Pai. 4:22f). “Kumpite” (2Sam. 7:14; Lat. 89:26) leh “vantungmite” (Pian. 6:2) zong Pasian tate a kicihna mun Lai Siangtho sungah kimu hi. Thuciam Lui leh Thuciam Thak kikal hun lai-in (Intertestamental period), Pasian deihna banga gamtate pen “Pasian tate” kici-in, Thuciam Thak hun ciangin (adiakin Synoptic sungah) ‘Bang ci bangin kizang hiam?’ cih pen tomno cikin en ding hi hang.

1. SYNOPTIC GOSPELS SUNG-AH

Pasian Tapa hihna za pen Mihing Tapa bang a Jesu in Amah (Jesu) leh Amah a kisapna kammal hi lo hi. Pasian Tapa ahihna pen Lungdamna Thu bu thumte sungah tangzai takin kigenin, Lai Siangtho siam pawlkhatte in Grik mite zatna pan a kilasawn hi dingin tuat uh hi. Amaute in, Jesu in na lamdang a bawlna hangin Pasian Tapa suak dingin ngaihsun uh hi. Ahi zongin hih ngaihsutna pen kisang kimlo hi. A mantakin cilehang, Jesu in na lamdang a bawlna hangin Pasian Tapa a suak hipan bek loin, Pasian deihna banga a gamtatna hangin Pasian Tapa a suak hizaw hi. A Pa thu a manna hangin Pasian Tapa hizaw, cihna hi. A nuaia kigen thute panin Jesu pen Pasian Tapa taktak ahihna kitel thei ding hi.

(a) Jesu Kituiphumna Panin: Jesu kituiphumna-ah, vantung panin Pasian in “Nang pen ka it mahmah ka Tapa na hi a, nang tungah ka lungkim mahmah hi” (Mk. 1:11) ci hi. Pawlkhatte in, Pasian in Jesu pen a kituiphumna-ah Messiah dingin sang (appoint) pan hi, ci-in gen uh hi. Ahi zongin G. E. Ladd-in, ‘kisang’ cih sangin ‘kiteel’ (elect) cileng kilawmzaw dingin tuat hi. Amah in, Pasian Tapa a hihna tawh Messiah nasep (office) a sem cihna hizaw ahih manin, Messiah nasep a sep theihna dingin Pasian Tapa a suak masak kul hi. Tua ahih manin, a kituiphumna-ah Jesu pen Pasian Tapa a suak pan bek hi loin, Pasian Tapa a hihna omsa pen kikipsak hilelzaw hi.

(b) A Kize-etna Panin: Jesu kize-etna ah dawimangpa in “Pasian Tapa na hih takpi leh…” (Mt. 4:3, 6) ci-in thu sit hi. Dawite nangawnin zong Jesu pen Pasian Tapa ahihna thu pulak uh hi (Mt. 3:11 = Lk. 4: 41). A diakin Marka 3:11 leh 5:7 sungah Jesu pen dawite tungah a gualzawhna hangin Pasian Tapa kici hi.

(c) Sanhedrin Mai-ah: Siampi lian penpa in Jesu kiangah, “Phatna a ngah Pasian Tapa, Khris na hi hiam?” (Mk. 14:61) ci-in dong hi. Jesu dawnna pen ciamtehhuai mahmah hi. Amah in “Ka hi hi…” (Mk. 14:62) ci-in dawng hi.

Tua banah, Jesu pen Pasian Tapa ahihna melkikhelna (Mk. 9:7) leh Piter-in “Pasian Tapa ahi Messiah…” ci-in a tangkona panin zong kimu thei hi (Mt. 16:16). Jesu tektek mahin zong Pasian pen “ka Pa” hiam “Pa” ci-in sam hi (Mt.11:25-27; Lk. 10:22).

2. PASIAN TAPA IN A DEIHNA

Jesu pen Pasian Tapa a kicih ciangin bang deihna om hi ding hiam? cih dotna om thei hi. Pasian Tapa ahihna hang bek tawh Ama vangliatna (divinity) a kilangkhia hi loin, Amah in nasep (mission) dang zong nei hi.

(a) Jesu pen Khris/Messiah (Pasian sathau nilh) ahihna lak hi. Marka in Jesu pen “Pasian Tapa Jesu Khris (Messiah)” ci-in gen hi (Mk. 1:1). Tua mah bangin, Marka 14:61 sungah “Pasian Tapa, Khris (Messiah) na hi hiam?” ci-a dotna kimu in, Jesu in “Ka hi hi…” ci-in dawngkik hi (Mk. 14:62).

(b) Jesu pen dawite tunga thuneipa ahihna zong lak hi. Amah in Pasian Tapa ahihna tawh dawite hawlkhia-in, dawite in zong Pasian Tapa ahihna teci pang uh hi (Mk. 1: 23-27; cf. Mk. 3:11).

(c) Pa tawh a kinaina (intimacy) lim hi. Amah in, “Ka Pa in kei tungah na khempeuh hong pia khin hi. Pa sim loh Tapa a thei kuamah omlo a, Tapa leh Tapa in a theihsaknop mite sim loh, Pa a thei kua mah omlo hi” (Mt. 11:27) ci-in gen hi. Pa in a Tapa a theihcian mah bangin, Tapa in zong a Pa theician hi. Amaute kikala kitheihna pen mihingte kitheih dan ngeina bang hi loin, pumkhat ahih man uh a kitheihna ahih manin (not acquired but direct knowledge), thuk mahmah hi.

Marka 1:25 sung panin zong Pasian tawh a kinaina lim kimu thei hi.  Amah pen Pasian Tapa it-tuam leh teeltuam (special) ahih manin, Pa hihna khempeuh zong nei hi. Tua ahih manin, Tapa a theite in Pa zong thei hi, ci-in kigen hi. Benedict T. Viviano in Jesu pen Pa limlak (tradition) hi a cih pen kilawm mahmah hi.

THUKHUPNA

Jesu pen Pasian Tapa ahihna dawite, mihingte leh Pasian tektekin teci pang ahih manin, zuau thu hi lo hi. Tua mah bangin, Khristian masate in Jesu pen Pasian Tapa hi, ci-in na lenkip uh hi. Piter-in Jesu pen Pasian Tapa Messiah, ci-in a pulak ciangin Amah (Jesu) pen Pasian kiang pan a hong pai ahihna leh Pasian tawh kizopna hoih tak nei ahihna thu hong lak hi.