Thukham hilh sia cihna kammal “scribe” (English) pen Hebru pau “Soperim” pan a kilasawn hi-in, Grik pau in “Grammateis/nomikoi/nomodidaskaloi” ci-in kitei hi. Tedim Lai Siangtho sungah “laitheite” a kicihna mun omin, “Thukham hilh siate” (nomodidaskaloi) a kicihna mun zong om hi. Amaute in Thukham tawh kisai-in theihna tangzai tak nei uh ahih manin, sitni (lawyer) ci-in kigen liang hi (e.g. Twelftree). Tulai pau kawm pak lehang, amaute pen scholar (siamna sang a nei) ahih kei uh leh, theologian (Lai Siangtho siam, a diakin Thukham tawh kisai) ahi uh hi. Amaute in Moses Thukhamte hilhcianna nei-in, kemcing uh hi. Puahphat kisamna a om leh puahpha-in, behlap a kulna munte ah zong behlapin, a kitukalhte lemtuah uh a; khangsawnte simtheih dingin zuun uh hi. A siamna leh pilna uh hangin Judahte thukhenna zumpi Sanhedrin[1] ah zong member ahi uh hi.
Tua zahta in Thukham tawh kisai in theihna kicing nei uh ahih manin, Messiah hong kilak hun ding zong telcian mahmah uh hi. Amaute zong Judah minam dang khempeuhte mah bangin Messiah hong pai ding ngak a om ahi uh hi. Messiah pen a galhat mahmah leh Rom kumpi nangawn a paikhiazo dingin tuat uh ahih manin, kiniamkhiat tak a hong pai Jesu (Messiah) pen thei khalo mawk uh hi. Jesu pen Messiah in a kisan’theih lohna hang hikha thei ding a ngaihsutte John F. MacArthur in a nuaia bangin gen hi.
(a) Jesu in Pasian tawh kizakim bangin kampau ahih manin (Mk. 2:7). Tua banah, mawhnei mite leh siahdongte tawh a kikholhna hangin zong Jesu pen Messiah in sang zolo uh hikha thei hi (cf. Lk. 19:1-10). Jesu leh a nungzuite in khanglui ngeina zui loin, khut sil loin ann ne uh ahih manin, Pasian kiang pan a hong pai dingin ngaihsut haksa sa uh hi (cf. Mt. 15:2). Pasian sawl Messiah hileh pen Judahte ngeinate zuikim dingin tuat uh hi (cf. Mk. 7:5). Tua ahih manin, Jesu hihna pen muangmawh in (cf. Mk. 2:6; 3:22; 11:27), nuihsan lel uh hi (Mk. 15:31).
(b) Amaute in thumanin nungta kisa uh hi. Tua ahih manin, Jesu pen amaute nuntakna dingin kisam sa khollo uh hi. Puan hoihpipi silh kawm a (Mk. 16:5) biakpiakna mun a (synagogue) pai hiam, pawi hun cianga a kipibawlna hiam, leh mite zahtakna a ngahna teng uh tawh amaute lungkim lel uh hi (Mk. 12:38-39). Amaute in Thukham hoihtakin a zuih laitak un, kiphatsakna tawh kidim uh hi.
(c) Amaute pen Thukham tawh buai lua uh ahih manin, Jesu pen phawk khalo uh hi. Thukham, kithoihna tuamtuam leh biakpiakna sung a nasep ding om teng tawh amaute buai khom mahmah uh hi. Amau siamna leh thu theihna tawh amaute lungkim lel uh ahih manin, Pasian Tapa adingin hun pia manlo in; Amah simmawh bawlin, a sihna dingin vaihawm uh hi. Messiah pen amaute adingin a kisapna bangmah omlo tawh kibang, cihna ahi hi.
[1] Sanhedrin pen Judahte thukhenna zumpi hi-in, member 71 omin, amaute in Judah minamte tungah vaihawm uh hi. Hih vaihawmna sung a member-te: Vaihawmna makai leh a lianpen in siampi lianpenpa kikoih in, a zom-ah Jerusalem Biakinn cing (captain of the temple) omin, tua banah Saddusi, Pharisai, upate, siampi lian a semngei sate (rulers) leh Thukham hilh siate (scribes), cih bangin om uh hi.
LAI-LEENG 